繼續同史友們介紹一啲歷史人物死前所講嘅說話，之前就同史友們講到韓信死前就講咗「我不服」三個字，咁到底可圈可點嘅「一代梟雄」袁世凱死前又有咩講呢？答案就係「楊度誤我」喇！
對於袁世凱點樣由駐朝鮮「通商大臣」慢慢化身成北洋政府最高領導人、臨時大總統等，相信呢段繼歷唔少史友都相當熟悉，但到底邊個係「楊度」呢？點解呢個名又咁少被提及呢？
其實楊度係清末君主立憲派嘅重要人物，喺早年佢就已經留學日本，雖然佢係接受維新思想，但佢始終都係反對共和革命，所以佢喺清末到民初就參加咗袁世凱嘅復辟，希望最終可以做到君主立憲救國。
而喺袁世凱籌備舉行登基大典之時，蔡鍔等人發起「護國」運動，而神奇嘅係，蔡鍔之所以會被袁世凱重用，就係因為有楊度推薦。最終，「洪憲」皇朝喺北洋軍戰敗之下，袁世凱宣佈撤銷帝制。而同時間，楊度雖然備受各方攻擊，但佢對於袁世凱撤銷「承認帝制案」極為不滿，甚至仲認為佢係反覆無常，奮然決定辭去參政院參政。
而喺袁世凱去世前，據講佢係曾經大聲講過「楊度誤我，楊度誤我啊」，呢句說話亦都被後來認為原本大權在握嘅袁世凱，最終係因為大膽推行君主立憲制嘅楊度，最終嘅權力都變成「黃粱一夢」。
喺袁世凱去世後，楊度前去弔唁，寫下挽聯，「明公負洪憲，洪憲不負明公；九原可作，三復斯言」，唔知史友們又點睇呢？
原圖嚟自網絡